पाथीभरामा ३६ क्विन्टल सिक्काको गणना सुरु

---

ताप्लेजुङ, ६ भदौ । प्रसिद्ध धार्मिक स्थल पाथीभरामा पछिल्ला १० महिनामा संकलन भएको ३६ क्विन्टल सिक्काको गणना सुरु भएको छ । पाथीभरा क्षेत्र विकास समितिका कर्मचारीले भेटी संकलन गरी गणनाको कार्य अघि बढाएका हुन् ।

अबिरलगायतका फोहोर लागेको सिक्कालाई उपकरणमार्फत धोएर, घाममा सुकाएर मात्र गणना गरिन्छ । घाम लाग्ने दिनमा करिब एक क्विन्टल सिक्का गणना हुने पाथीभरा क्षेत्र विकास समितिका कार्यकारी निर्देश प्रजिन हाङपाङले बताउनुभयो ।

पाथीभरामा आफ्नो मनोकांक्षा पुरा गर्नका लागि भक्तजनहरुले सिक्का चढाउने गर्दछन् । नेपाली मात्र नभई भारतीय तथा अन्य मुलुकका सिक्कासमेत भक्तजनहरुले चढाउने गरेका छन् । गणकहरुले छुट्टा—छुटै देशका सिक्काहरु छुट्याएर प्याकेजिङ गर्दै आएको गणक मैवादेवी न्यौपानेले बताउनुभयो ।

https://youtu.be/8jf-pBR7Y1M 

अघिल्लो आर्थिक वर्ष २०८०/८१ मा मात्र करिब १५ लाख रुपैयाँ बराबरको सिक्का सङ्कलन भएको थियो । गणनाका लागि हाल समितिले आठ जना कर्मचारी परिचालन गरेको छ । हरेक दिन भेटी संकलन गरी माथिल्लो फेदीमा भण्डारण गर्ने गरिएको समितिले जनाएको छ। नगद भेटीको गणना सकेपछि सिक्का गणना सुरु गरिएको हो ।

सिक्का गणना गरी विभिन्न बैंक तथा जिल्ला बाहिरका ठूला डिपार्टमेन्ट स्टोरमा सटही गरिँदै आएको समितिको भनाइ छ । तर, भारतलगायतका मुलुकका सिक्का तथा नोट सटहीमा भने समितिलाई चुनौती आइरहेको छ ।