२० कार्तिक २०८२, बिहीबार २०:०४
नवलपुर । नवलपुरमा करिब ३० हजार बालबालिकालाई भिटामिन ए खुवाइँदै छ । नेपाल सरकारको राष्ट्रिय कार्यक्रम अन्तर्गत ६ महिनादेखि ५९ महिनासम्मका बालबालिकालाई बिहीबार र शुक्रबार भिटामिन ए र जुकाको औषधि खुवाउन लागिएको हो ।
प्रदेश जनस्वास्थ्य कार्यालय नवलपरासी (बर्दघाट–सुस्तापूर्व)का सूचना अधिकारी जनस्वास्थ्य अधिकृत छविलाल सुवेदीले बिहीबारमात्रै जिल्लाका करिब ५० प्रतिशत बालबालिकालाई भिटामिन ए र जुकाको औषधि खुवाइएको बताउनुभयो । उहाँकाअनुसार दुई दिनसम्म सञ्चालन हुने कार्यक्रमबाट जिल्लाका २९ हजार ९२५ बालबालिकालाई भिटामिन ए तथा २३ हजार ८८० बालबालिकालाई जुकाको औषधि खुवाइँदैछ । ६ महिनादेखि ५९ महिनासम्मका बालबालिकालाई भिटामिन ए तथा १२ महिनादेखि ५९ महिनासम्मका बालबालिकालाई जुकाको औषधि खुवाउने कार्यक्रम रहेको सुवेदीले बताउनुभयो ।
बालबालिकाहरुलाई बालभिटा समेत खुवाउने कार्यक्रम भए पनि बालभिटा पर्याप्त आउन नसकेको उहाँले बताउनुभयो । उहाँकाअनुसार बिहीबार भिटामिन ए र जुकाको औषधि खुवाउन छुटेका बालबालिकालाई शुक्रबार खुवाइनेछ । “जिल्लाका सत प्रतिशत बालबालिकालाई भिटामिन ए र जुकाको औषधि खुवाउने लक्ष्य रहेको छ” उहाँले भन्नुभयो, “विगतको नजिता हेर्दा हामीले लक्ष्य भेटाउँछौँ ।”
हरेक पालिकाको वडामा महिला स्वास्थ्य स्वयंसेविकामार्फत भिटामिन ए र जुकाको औषधि खुवाइएको उहाँले बताउनुभयो । भिटामिन ए र जुकाको औषधि खुवाउन जिल्लाका ३५९ जना महिला स्वास्थ्य स्वयंसेविका परिचालन गरिएको सुवेदीको भनाइ छ ।
प्रतिकृया दिनुहोस्